獄中戴耀廷 歪理說不停
獄中戴耀廷 歪理說不停

雖然佔中九犯被定罪,當中戴耀廷等四人已經坐緊監,但盲反派似乎仲未心息,要喺輿論上為佔中九犯以至整個盲反派陣營「平反」;而素來喜愛用文字散播歪理嘅戴耀廷,坐緊監都不忘繼續散播「違法達義」思想,今日有報章就登咗佢一篇評論文章,佢就喺度同法庭甚至社會商榷到底「公民抗命」點樣先為之「合乎比例」,歪理一大堆,廣男想講句,如果違法佔領行動堵塞咗香港幾條主要幹道都仲可以拗係咪「合乎比例」,咁要堵路堵到咩程度,先叫唔「合乎比例」呢?


任意引用法官


戴耀廷呢啲所謂「法律學者」,講法律嘅時候最厲害果套,就係將唔同概念甚至唔同人講嘅嘢扭曲,啱用嘅引用,唔啱用嘅忽略,即係斷章取義,總知要對自己最有利;好似佢今日喺《生果報》登果篇題為〈來自香港監獄的信函〉嘅文章咁,就稱「馬丁路德金博士在闡釋公民抗命的理念時,並沒有提出合乎比例的原則」,只係其他學者之後提出、又畀終審法院非常任法官、英國大法官賀輔明勳爵(Lord Hoffmann)將有關要求包含喺「公民抗命」內。


廣男覺得好奇怪,明明戴耀廷之前都引用過賀輔明勳爵稱「公民抗命在普通法有悠久及光榮的歷史,有人真誠地違反法律去挑戰法律或政府行為中的不公義是文明社會的標記」、「法庭在判刑時必須考慮公民抗命者真誠的動機」等等,想借賀輔明勳爵一番話為違法佔領「狡辯」,而家又話馬丁路德金都冇講過「公民抗命」要點樣「合乎比例」,即係賀輔明勳爵啱用果啲佢就用,唔啱佢用果啲佢就當「睇唔到」?咁佢講乜都得啦,擺明係玩「語言偽術」!


違法佔中如何合乎比例?


至於戴耀廷喺文章爭論佔中係咪「合乎比例」嘅問題,廣男覺得呢個唔單止係法律問題,更加係常識問題;喺違法佔領79日期間,香港島以至九龍區都有主要交通幹通被堵塞,戴耀廷仲要商榷係咪「合乎比例」,或者稱「法庭起碼要有更詳盡的數據去論證社會代價的大小」,廣男真係想問佢,係咪要香港所有街道都塞晒,先叫唔「合乎比例」呢?又或者,佢要法庭有更詳盡嘅數據去論證社會代價,係咪有人計到代價有幾大,戴耀廷就算「破產」都賠償損失先?


當戴耀廷不斷重提「公民抗命」嘅時候,廣男又要溫馨提示下戴耀廷以至大家,戴耀廷所謂「公民抗命」或者「違法達義」,成個行動不斷出現衝突、暴力場面,一來唔符合「公民抗命」嘅非暴力原則,二來對社會造成過量不便,三來眾犯人無喺法庭認罪承擔罪責,根本唔係咩「公民抗命」。所以,廣男喺度必須要同戴耀廷講句,你唔好呃人啦!


原圖: 中新社

16
嬲爆
8
唔係呀哇
2
無意見

評論

  • jthk
    jthk
    4年前
    0 回應 檢舉
    "點樣先為之「合乎比例」"?戴耀廷唔知有樣嘢叫公眾利益嗎?我們小市民就知道佔中令到大部份的市民非常不滿,感到生活與自由受到嚴重滋擾,更長達70天,更是被忍無可忍的市民入禀法庭,要求發出禁制令,佔中的更藐視法庭,不肯撤出法庭要求的範圍...這些完全不符合公眾利益,更公然藐視法庭的行為,更帶出所謂"鳩烏"滋擾商店營業、放土製炸彈、旺角騷亂、暴力衝擊立法會等...判16個月監禁,都是不合乎比例的短!
    • jthk
      jthk
      4年前
      0 回應 檢舉
      法庭都話如有需要,可向更高法院尋求更多解釋,可以上訴喎!自己都搞到要坐監,還要扮識野!

      沒有更多評論

      沒有更多評論