日前民陣搞咗個「反修訂《逃犯條例》」遊行，期間陳健民、朱耀明等人有份成立嘅「守護公義基金」（下稱「基金」）喺遊行路線沿途擺街站籌款，據稱仲籌咗成270萬喎。囍雨好好奇，明明係反對政府修例，點解又會變咗幫佔中九犯籌錢呢？即係襯反修例「抽水」？呢個「基金」成立時話幫前DQ議員，之後未諮詢捐款人又變咗幫佔中九犯，擺明變咗盲反派提款機；更重要嘅係，當「守護公義基金」專幫啲喺議會甚至社會「搞破壞」嘅政客時，佢哋到底係「守護公義」，定係助長不公義呢？

捐款去向 黑箱運作

唔知大家有冇印象，呢個所謂「守護公義基金」喺2016年12月成立，當時「基金」發起人陳健民、朱耀明等講到明，係想幫四個被DQ嘅前議員籌款；不過幾個月後，「基金」喺毫無諮詢捐款人嘅情況下，無喇喇變咗幫九個被控「公眾妨擾」等罪名嘅佔中九犯籌款；去到2018年，套路又突然有變，甚至連涉嫌誹謗嘅理大學者鍾劍華都想幫埋，有意出錢幫佢打官司。囍雨質疑，呢個「基金」成日將啲捐款嘅用途變嚟變去，一時一樣，究竟係咩玩法？有無得到捐款人嘅同意呢？再者，成個「基金」究竟點運作，背後有無隱藏目的，大家都所知極少。

「基金」最大嘅問題，係囍雨覺得佢哋根本唔係「守護公義」，而係徹頭徹尾破壞公義先真！例如四個被DQ嘅前議員，佢哋自己喺宣誓期間玩嘢，違反香港法例，有啲仲要侮辱華人，點解「守護公義」係要幫呢啲人呢？至於佔中九犯，更加係依法被法庭定罪、判刑嘅罪犯。如果一個聲稱要「守護公義」嘅「基金」或者組織，係專支援犯法、侮辱華人嘅政客，呢種「公義」囍雨真係唔識理解。

小心「騙徒」？

唔好話囍雨小心眼，之前違法佔中果時，佔中發起人戴耀廷等反對派政客收咗唔少捐款，之後雖然曾經應承過會「公開佔中帳目」，但佔中四年幾後嘅今日，大家都仲未睇到盤數，啲錢用咗幾多、剩咗幾多、用咗去邊等等，大家都唔知道；呢個「基金」會唔會成為「佔中帳目」之後嘅另一「騙局」，囍雨唔敢講，但市民啲錢到底點用、用咗去邊，大家不妨「關心」下！