聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
不死的「死士」
不死的「死士」

違法佔領九犯罪成,坊間有唔少意見都認為除咗九犯之外,其他佔領主事者都應該被檢控,廣男最記得果時盲反派有班人自稱為「佔中」十死士,聯同「佔中」三人話決志要參與「佔中」,之後會主動自首、喺法庭不作抗辯;但事過境遷,「佔中」十死士入面除咗邵家臻之外,基本上其餘死士都未承擔罪責。廣男真係覺得好懊惱,原來龜縮、怕死嘅,都可以叫「死士」?

 

事前威水 事後抽水

 

廣男之所以「突然」諗起「佔中」十死士,除咗係因為十死士之一嘅錢志健接受傳媒訪問,話要考慮舉家移民加拿大之外,廣男今日睇新聞,見到《生果報》有篇報道訪問十死士,當中徐少驊話自己「都係有罪一員」、教協前理事潘瑩明就話公民抗命「無人應該受罰」、牧師郭乃弘就話每月都為香港同「佔中」犯祈禱。呢班人講到咁「感慨」,但廣男剩係想問佢哋一個問題,佢哋自稱「佔中」死士,佢哋到底有冇去警署自首,承擔罪責先?

 

呢班所謂「死士」,當初係威係勢,又話要參與「佔中」,又話要自首,講到好偉大咁款,到真係要自首、承擔罪責嘅時候,原來都係「貪生怕死」,唔找數不特止,仲要事後喺度抽水(注意:邵家臻雖然有「自首」,但喺法庭係否認控罪嘅)。老實講,如果一早無諗住找數,好心佢哋想當初就唔好講到自己咁型啦,怕死嘅「死士」,仲稱得上係「死士」?唔好玩啦!

 

害苦了香港人

 

無論係「佔中」九犯抑或係呢班所謂嘅「佔中」死士都好,佢哋除咗係講完、做完唔認數,佢哋最錯嘅地方,就係一班人煽動完其他人同佢哋一齊犯法,唔少人聽佢哋老點,衝完、犯法完甚至控罪都被定喇,呢班人先行出嚟講,我哋雖然係公民抗命,但控罪唔合適我哋唔認罪喇,名符其實「叫人衝,自己縮」。喺呢度,廣男要再度重申,公民抗命係要非暴力、冇造成過量破壞以及願意承擔罪責嘅,所以盲反派呢班人嚴格嚟講唔係咩公民抗命,而只係一班犯咗法想賴皮嘅政棍。

6
搞笑咩
4
嬲爆
0
無意見

評論