黃之鋒「獨」性不改
黃之鋒「獨」性不改

「佔中九罪犯」被裁定罪名成立之後,廣男發覺,盲反派以至外國勢力都不斷為九犯塗脂抹粉,犯法事情都講到做「善事」咁款。最新嘅例子,就係「香港眾志」秘書長黃之鋒噚日漏液喺社交網絡轉發咗一篇外國「知名人士」支持「佔中九男女」嘅貼文。究竟邊位「知名人士」咁有power,吸引到連黃之鋒都趨之若鶩?咪就係因為搞「獨立」而被西班牙通緝嘅西班牙加泰隆尼亞自治區政府前主席普伊格德蒙特(Carles Puigdemont)囉。點解一個被通緝緊嘅「獨」派人物講嘢,黃之鋒要急急腳分享人講乜?只要大家了解黃之鋒由「自決」到「港獨」嘅心路歷程,大概就會心領神會喇!


未判刑何來「重判」?


話說普伊格德蒙特今次呢篇帖文係用中文寫,聲稱「民主與言論自由再次遭到了攻擊,踐踏」,因為佔中九罪犯「被重判」,所以佢要表達「全盤支持」,仲話要同九罪犯「團結與共」云云;但廣男想問下,普伊格德蒙特先生講到好似好關心呢班違法佔領搞手咁,但究竟佢有無認真睇新聞呢?法官都未判刑(4月24日宣判),你就話「被重判」,係咪有嘢搞錯咗?!另外,違法佔領期間有人堵路、包圍、衝擊甚至襲警,相信任何地方嘅政府都好難容忍同唔執法,關民主同言論自由咩事呢?


至於好「快手」地分享普伊格德蒙特貼文嘅黃之鋒,廣男就喺度諗咁多人評論過違法佔領呢單嘢,點解黃之鋒連一個「西班牙政客」、仲要係被通緝嘅政客嘅嘢都急住要分享呢?唔通係因為佢哋理念相近?凡此種種,又令廣男諗起黃之鋒所屬嘅「香港眾志」,擺明係Sell「民主自決」,仲講過話要「將香港從中國獨立出去係公投嘅一個選項」,喺今年年初嘅遊行,廣男仲記得黃之鋒攞住「港獨」宣傳品衝入政總。而家眼見加泰隆尼亞「獨」派撐違法佔領,黃之鋒急急分享,諗落都係「合理」嘅!

 

黃之鋒「未找數」


前幾日廣男聽電台,黃之鋒對住電台節目主持人「解釋」自己喺違法佔領發生前已經被捕,而佢畀警方放番出嚟之後違法佔領已經開始,所以佢無畀人告云云;但廣男想指出,喺違法佔領期間多次喺「大台」講嘢,當時甚至上埋國際雜誌封面,畀人話係「風雲人物」等,如果違法佔領嘅「風雲人物」唔駛找數,大家話合唔合理呢?


原圖:黃之鋒facebook

8
嬲爆
5
驚訝
8
唔係呀哇

評論