出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
戴耀廷想燃點的 根本是「違法」種子
戴耀廷想燃點的 根本是「違法」種子

佔中九罪犯案下星期宣判,雖然早前法官已經裁定9人全部罪名成立,不過,違法佔領發起人戴耀廷似乎就完全無因為自己有罪而反省,反而不知收斂,繼續喺報章發文,宣揚佢所謂嘅「佔中精神」,稱只要唔好放棄、繼續「燃點愛與和平的火種」、「敢於散播希望」,香港就會有「黃金時代」云云。囍雨想講,其實時至今日,大家都已經明白「違法佔領」發生緊咩事,除咗暴力、犯法、撕裂社會、損害經濟,根本從來就無所謂嘅「愛與和平」,更加唔會令香港有咩「黃金時代」,戴耀廷仲喺度叫人「堅持」、「繼續」,係咪即係叫人繼續犯法,繼續破壞香港呢?

 

戴耀廷篇文題為〈燃燈、敲鐘、追夢〉,用呢三組詞語,點出佢同另外兩位違法佔領發起人嘅「論述」,包括陳健民喺中大嘅「最後一課」、朱耀明嘅「最後陳情」以及佢自己嘅「結案陳辭」。囍雨睇完全文得一個感覺,就係戴耀廷講來講去都係要美化「違法達義」、「公民抗命」,講到佢哋呢班違法佔領搞手為咗實現香港嘅民主好偉大咁款,但有「偉大」理想,都唔可以犯法、破壞社會秩序架!

 

以犯法為手段都叫「香港希望」?


喺呢度,囍雨想問下戴耀廷等人,違法佔領長達79日,睇番受阻嘅市民、受傷嘅執法人員、受衝擊嘅商販,佢哋幾時感受過「愛與和平」?一個「佔」字,足以印證呢場運動係唔合理、唔合法!戴耀廷依家極盡能事所「歌頌」嘅,講到尾其實就係一班政客以違法行為去達至自己嘅訴求;但係大家試諗下,如果有朝一日,香港變成一個只要有訴求就可以用犯法、暴力嘅手段去達成嘅地方,香港咁仲有咩「希望」可言?咁樣絕對唔係「黃金時代」,而係「動亂時代」先啱!

 

講到明要「佔中繼續影響香港」


事實上,戴耀廷呢班人即使面對判刑,都仲係不知悔改!一直以來,佢哋都迴避緊自己嘅罪責,明明講好會承擔罪責,但上到庭就否認控罪,甚至稱罪成就會上訴!但更令人擔憂嘅係,呢班違法佔領搞手,似乎仲未諗住收手,如戴耀廷篇文所講,要「把大家心中的火重新燃點起來」、「相信佔中的精神仍會不斷影響香港社會」等,唔係話畀人聽自己願意負責任,而係叫大家「秉承」佢哋嘅「違法達義」精神,即係繼續抗爭,甚至繼續犯法!可能大家覺得戴耀廷寫文都係「吹水」,唔需要太過在意,但大家唔好忘記,嚴重破壞香港秩序嘅違法佔領,都係戴耀廷想當初「吹出嚟」嘅概念,如果社會掉以輕心,隨時又萬劫不復;所以,與其唔理呢啲隨時害咗年青人同香港嘅「違法達義」歪理,大家不如小心應對、防微杜漸,小心身邊年青人又畀戴耀廷等政客洗腦,做政治爛頭卒,破壞屬於大家嘅香港。


原圖:rthk

12
嬲爆
3
驚訝
1
無意見

評論