聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
林卓廷對內無情無義 對外胡作非為
林卓廷對內無情無義 對外胡作非為

民主黨成員林子健因為訛稱畀人地人員擄走、虐待(下稱「釘書釘」件事),經法庭審訊後被裁定「明知地向警務人員虛報有人犯罪」罪成,被判入獄五個月,佢獲准保釋等候上訴;對於林子健「報假案」呢單嘢,外界除咗關心林子健面臨嘅判決之外,大家似乎更加關心一直喺「釘書釘」事件推波助瀾,但林子健畀人踢爆講大話之後即刻潛水、切割嘅民主黨立法會議員林卓廷有咩回應。一如廣男所料,林卓廷唔單止無到庭支持林子健,案件宣判後亦無表示會支援林子健。嗱,呢啲有得做政治騷就推林子健出嚟,出咗事就即刻潛水加切割嘅人,咪叫「兄弟」囉!


林卓廷唔尊重法庭判決?


老實講,林卓廷唔到法庭支持林子健,都可以話係意料中事,事關佢由林子健被踢爆講大話開始,基本上就已經無見過佢同林子健一齊,由法庭開始審訊到宣判,林卓廷更加係一於少理。大家「最多見到」嘅,只係林卓廷就案件判決發表聲明,稱「尊重法庭判決,由於林子健正等候上訴,為免影響法庭程序及判決,暫時不便評論」;但離奇嘅係佢喺15分鐘後更新聲明,刪去「尊重法庭判決」字眼,一時話尊重法庭判決,一時又刪番走有關字眼,到底林卓廷係尊重定唔尊重法庭判決先?


林子健犯法,固然係相當唔啱,但廣男唔覺得民主黨一眾「大哥、大姐」好得幾多,當時傳媒報道過,林子健喺「事發」前,係同民主黨班「大哥、大姐」商量後先出嚟開記者會嘅,當時除咗林卓廷仲有李柱銘、何俊仁等人陪同林子健開記者會「作故仔」,林卓廷之後甚至陪林子健去醫院驗傷,又喺電台節目炮轟政府官員。好啦,到出咗事喇,林卓廷等人即刻唔理林子健,好似林子健唔係民主黨嘅咁,囍雨只能夠用「無情無義」嚟形容林卓廷等人!


民主黨胡作非為


林子健被判罪成,無論佢上訴成功與否,廣男覺得件事根本就未完結,因為當時「作故仔」嘅,唔止林子健一個人,林卓廷等人一樣有份,例如林卓廷曾經揚言港府應該發出強烈訊息表明香港係不容許任何人濫用私刑,又話林子健大髀上21口釘就係證據。如果林子健被定罪,林卓廷係咪都有罪嫌呢?又或者,林子健罪成,係咪證明咗林卓廷為咗政治攻訐內地政府而老屈內地政府,應該畀公眾一個交代呢?林卓廷如果覺得自己係無罪嘅,不妨攞證據出嚟「自證清白」呀!


原圖:RTHK

13
嬲爆
4
超無奈
6
好好笑
1
無意見

評論