全國政協副主席梁振英出任新成立嘅大型國際人道組織「共享基金會」主席，報道指基金會嘅由來係源自「一帶一路」嘅共享精神。本來有志服務社會、回饋社會嘅人成立人道組織係一件好事，偏偏凡事都以「陰謀論」看待嘅《生果報》，近日就係咁透過報道、「政情」類嘅文章係咁「攻」梁振英。廣男就覺得，當一啲社會人士做善事都要被攻訐嘅時候，《生果報》嘅「扭新聞」能力真係令人不得不服，果然係「反中亂港」嘅「最強份子」！

《生果報》創作力強？

喺前幾日，其實《生果報》已經有報道過梁振英出任「共享基金會」主席一事，今日《生果報》就再進一步，利用類似政情類嘅文章，引用「政界中人」見解，話梁振英搞人道援助只係手段，搞「民間外交」、「藉此提升在中央地位」先係真正目的，仲話喺何志平（前民政局局長）出事後，要搞民間外交嘅風險唔會低等等。

老實講，當《生果報》用上「政界中人見解」呢個說法，基本上佢講乜都得啦，不過呢啲都唔緊要，媒體不時都會引用「消息人士」。問題係人哋做人道救援，咁《生果報》就寫做人道救援只係「手段」，搞XXXX先係「目的」；套用呢個邏輯，就係話某啲人雖然係做好事，但背後係有XXXX目的嘅。當人哋做好事都要畀《生果報》好似「心懷不軌」嘅時候，《生果報》扭曲是非嘅「能力」，廣男係真心佩服嘅！

壹傳媒都要把握「一帶一路」機遇？

當《生果報》攞「共享基金會」嚟做新聞嘅時候，廣男真係好想講，「共享基金會」嘅共享精神嚟自「一帶一路」，呢啲係好正常嘅事，就等於之前睇過壹傳媒（蘋果日報母公司）嘅業績報告，入面都寫明「一帶一路倡議重新整頓服務及消費行業經濟，為傳媒行業掀開全新機遇。本集團已在各方面準備就緒，務求以一系列創新產品和服務抓住該等機遇」啦！而家係咪梁振英等社會賢達搞「共享基金會」做人道救援就唔得，《生果報》以至壹傳媒把握「一帶一路」機遇就得先？咁即係要「佔了便宜又賣乖」啫！

原圖：Takungpao