香港啲「港獨」組織成員真心怪，一方面唔認自己係中國人，成日將中國批評得一無是處，但另一方面每到中國傳統節目，包括聽日就係嘅農曆新年，啲「港獨」組織又會蒲頭，藉新年去大力抽水（包括政治油水同金錢），大家話係唔係好奇怪呢？好似反中反到出晒位、甚至已經「港獨」出櫃嘅香港眾志咁，呢班人連日喺年宵市場擺檔，開開心心「CAP水」去。咦？香港眾志唔係好憎中國嘅咩？點解仲要趁住年宵，狂抽認同中國傳統節日嘅香港市民啲真金白銀呀？

香港眾志抽農曆新年水

囍雨知道，香港眾志同埋其他反中人士一定會話：「唓，而家都唔只中國人會過農曆新年啦！你唔畀香港眾志係慶祝緊其他國家嘅新年呀？」得，梗係得啦，囍雨份人又唔似「港獨」份子咁霸道，試問點會唔畀人講嘢？之不過咁，如果香港眾志真係慶祝緊其他國家新年的話，咁就麻煩佢哋事先同所有行年宵甚至會光顧佢哋嘅市民講清楚，但睇情況，囍雨又真係見唔到呢班人有咁做喎！

再者，雖然今日仍然有唔少國家地區係會慶祝農曆新年嘅，包括南韓、北韓、越南，以及日本琉球群島等等，但假如香港眾志真係夠膽話自己慶祝緊呢啲國家地區新年的話，咁就得意喇，點解唔見香港眾志喺年宵市場攤位有呢啲國家嘅文字、擺設、裝飾咁嘅？香港眾志嘅要員周庭講得一口流利日語，成日獲安排去日本唱衰中國、唱衰香港，如果佢班人真係慶祝「外國」新年的話，冇理由唔寫埋日文去宣傳喎！

政治道德倫理全部不合格

算喇算喇，就當香港眾志真係慶祝其他國家嘅農曆新年，咁農曆新年呢個節日，甚至會喺正月初一時慶祝嘅習俗，擺明都來自中國，由於資料實在太多，囍雨只會簡單交代一下；據說，漢代遵循儒家「行夏之時」嘅教義，漢武帝下詔推行太初歷，明確規定正月初一為歲首，亦即係新年。香港眾志上下唔認自己中國人，又否定晒中國嘅一切，試問點解又要趁農曆新年去抽水問市民拎錢呢？道德上、倫理上，全部都講唔過去囉。

所以話呢，「港獨」組織行事就係咁肉酸，又要唔認同國家、逢中必反，但去到大時大節為咗爭取市民認同，搖身一變變成認同中國傳統文化、要抽香港嗰班認同兼慶祝中國傳統節日市民銀包裡面嘅「水」。香港眾志，唔好以為著住件日式外套就冇人覺得農曆新年同中國關係密切先得架，你班人咁做真係好醜怪囉！

圖片來源：香港眾志FACEBOOK