電視節目造假問題 未解決
電視節目造假問題 未解決

之前廣男已經寫過,有電視台製作關於「買樓」嘅電視節目,喺其中一集就畀人踢爆佢哋疑似造假,搵舞台劇演員扮內地新移民接受訪問,引嚟社會一陣迴響。有關電視台日前就聲明,話因為當事人未能出鏡,所以搵咗個演員「演繹」咁話,仲為事件致歉;喺另一邊廂,又有人喺Facebook發帖,話該電視台要向有關演員道歉,還演員一個公道咁話,仲hashtag話「欺負演員可恥」。如果呢個係扮演節目,咁點解電視台又無講明,等畀人踢爆先認呢?成件事係點?呢單嘢果真撲朔迷離!


扮演節目與真訪問 大大不同


首先,廣男就覺得,ViuTV嘅《買樓狂想#曲》節目搵人扮「內地新移民」,咁最少都應該話畀觀眾知,呢個唔係真實訪問,而係一個「扮演」節目,甚至只係戲劇;如果搵演員扮「內地新移民」然後接受訪問再將節目出街,又無話畀人聽呢場係戲,咁人哋話該電視台造假,廣男又覺冇錯喎!同埋如果某一集嘅受訪者原來係演員,咁其他集數嘅受訪者,到底邊個係真正嘅受訪者,邊個係演員呢?電視台唔交代清楚,其他人就咁睇個節目未必分辨到架喎!


另外,有人喺Facebook出Post叫ViuTV向相關演員道歉,話要還演員清白同公道,仲話「演員是無辜的」、「欺負演員可恥」,咁廣男又有另一個疑問,就係呢個扮演「內地新移民」嘅演員黃劍冰,到底佢自己知唔知道所謂「扮演內地新移民」,係一場戲劇,定係當係「真受訪節目」出街呢?如果佢知道係後者但佢照演,咁佢當然都有問題啦;但如果佢以為係戲劇所以扮演,點知出咗街先知原來係「真受訪節目」,咁佢可能都係無辜架喎!


炒作兩地矛盾


除咗造假,廣男覺得呢個節目嘅另一個大問題,就係睇佢啲節目片段,似乎係想借機炒作內地香港嘅兩地矛盾,話畀聽眾聽香港嘅公共資源畀內地新移民利用;講真,涉嫌造假已經卑劣,炒作矛盾而借機吸收視、吸Like就更卑劣,如果幾句當事人唔能夠出境所以搵演員「演繹」、致歉就可以了事,咁以後電視台好、報章電台也好,睇怕都唔駛守咩規則,自己鍾意點做就點做都得喇!


原圖:ViuTV截圖

47
嬲爆
6
唔係呀哇
1
無意見

評論