聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
加國駐華大使被「炒」的迷思
加國駐華大使被「炒」的迷思

華為高層孟晚舟被加拿大政府無理拘捕,就連加拿大前駐華大使麥家廉亦因為對傳媒講真話而不幸中箭落馬,被該國昏庸嘅總理杜魯多炒魷魚,而且仲係立即生效。麥家廉講咗乜?大意係認為孟晚舟反對被引渡去美國嘅理據好強,又話假如美國可以放棄引渡孟晩舟,將會對加拿大解決事件有莫大裨益云云。一個駐華大使,本身亦係中國通,佢將自己對事件嘅解讀由衷咁講出嚟,希望加拿大唔好受到美國嘅牽連,結果最終都難逃被炒命運,真係令人唏噓。


麥家廉被「起底」真不該


被炒都唔緊要喎,最令人震驚嘅係,事發之後,立刻有加拿大媒體引述時事評論員言論,列出麥家廉嘅背景,包括佢本人妻子係馬來西亞華裔、三個新抱都係華裔等等,質疑佢關於華為事件嘅言論係出自親中情意結,而唔係為加拿大著想。睇到呢類評論,廣男真係眼都凸埋出嚟,到底麥家廉做咗乜嘢咁罪大惡極,搞到連家人嘅血統都要被人點評一番?


首先,國際公認架喇,外交官員獲委派去邦交國作為所屬國家嘅大使,除咗外交經驗要豐富之外,若然同相關邦交國有一定淵源,或者同相關邦交國領導人關係友好,毫無疑問肯定係優勢之一。舉個例,大家知唔知現任美國駐華大使係邊位呀?佢叫做布蘭斯塔德,曾任美國愛荷華州州長多年;不過呢個都唔係重點,重點係佢其實同現任中國國家主席習近平相識多年,據報兩人關係友好,中國外交部發言人仲曾經形容布蘭斯塔德係「中國人民的老朋友」添!


昔日的優勢 今日的原罪?


大家明白啦,搵邊個人去邦交國做大使,睇重獲任命者嘅背景根本就正常不過,加拿大輿論真係好應該撫心自問,當日加拿大政府委任麥家廉做駐華大使,唔通會唔係睇中佢嘅「背景」咩?係呀,咪就今日畀人質疑同「華人關係密切」嗰個「背景」囉!相同背景,當日係麥家廉做駐華大使嘅優勢,今日竟然因為相同背景畀人質疑「代表中國發言」,咁講通唔通先?


再者,麥家廉關於孟晚舟案件嘅言論到底有乜錯?佢一心希望加拿大盡快解決事件,唔好為咗美國而賠上一切,呢種唔係愛國情操係乜嘢?喂,呢件嘢真係唔關加拿大事架喎,孟晚舟冇犯過加拿大法律架喎,麥家廉愛國情切,唔想國家為他人作嫁衣裳,一切都好公道吖,何解加拿大政府同輿論要咁樣對待一個愛國者呢?唔通呢啲就係杜魯多口中嘅民主同法治價值?唔係啩!

12
嬲爆
9
唔係呀哇
6
令人傷心
3
超無奈

評論