聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
【精選文章】林卓廷「屈得就屈」?
【精選文章】林卓廷「屈得就屈」?

民主黨立法會議員林卓廷近期可以話係「人逢喜事精神爽」,首先炒作「UGL事件」失敗,律政司、廉署同埋審查貪污舉報諮詢委員會先後就事件還前特首梁振英一個清白;之後民主黨近60人退黨,仲話林卓廷人格卑劣、毫無政治道德;另一邊廂,林卓廷又畀人話佢離棄昔日好兄弟「釘書健」。最近,林卓廷又成為新聞焦點,就新界東北相關工程嘅投票問題同「土地正義聯盟」有爭拗,林卓廷畀「土盟」話佢轉軚,林卓廷就回應話人「屈得就屈」,之後「土盟」又調番轉話林卓廷先係「屈」。睇咗咁耐,廣男都有少少亂,唯一可以肯定嘅,就係林卓廷想「攬功勞」,又唔想畀人話佢反對建屋計劃囉!


民主黨立場詭異


對於發展新界東北,廣男首先要表示自己係支持嘅,而林卓廷支持有關撥款,廣男當然表示歡迎啦;不過,佢聲稱民主黨從無要求「不遷不拆」,廣男就覺得有少少玩「語言偽術」喇,事關廣男隨手Google下睇下立法會文件,就見到民主黨喺2012年對新界東北規劃發表意見,稱「很多受影響的居民亦表示,直至最後一刻才獲告知政府的發展規劃建議,過去根本沒機會作出充份的參與。因此應該撤回規劃發展建議,並進行廣泛諮詢,重新全民參與規劃」。唔通林卓廷想話「我哋要求撤回規劃建議啫,無話不遷不拆架」咁搞笑?


老老實實,民主黨好、林卓廷好,難得佢哋識得「覺今是而昨非」,大家都應該予以諒解嘅,廣男覺得最大問題,係林卓廷「強調」民主黨多年嚟一直聆聽村民、團體意見,意圖將改善方案歸功於自己,誰不知轉頭又畀人踢爆佢係侵吞前黨友劉其烽嘅功勞,「食得就食」。原來,過去一直負責入村了解村民需要最多嘅係劉其烽,根本唔係林卓廷!其實呢,少做嘢或者唔做嘢都唔緊要,但唔睇清楚自己個黨講過乜仲想攞功勞,林卓廷畀人圍插,又實在係有道理喎!


林卓廷果然人格卑劣


今次新界東北事件,廣男認為林卓廷最衰嘅地方,唔係話咩搬龍門、玩文字遊戲或者轉軚等等,誠如「土盟」所講,林卓廷所謂聆聽村民意見等等,其實落手做果個,根本就唔係佢本人為主,而係已經同佢分道揚鑣嘅前黨友。一個立法會議員、北區區議員,喺立法會剩係識炒作「UGL事件」,番到地區話「做返好上水」,原來唔係認真處理水貨客問題,而係叫人搬走電話亭。廣男真係想知,喺未來兩次選舉,選民仲會唔會支持呢個「電話廷」呢? 


圖片來源:RTHK

6
嬲爆
10
唔係呀哇
2
驚訝

評論