前幾日廣男寫文，話唔熟書嘅民主黨立法會議員兼北區區議員林卓廷竟然要求一條根本唔存在嘅巴士線「增加班次」，畀網民笑到佢面都黃，質疑佢到底係咪做實事；估唔到事隔幾日，林卓廷就即刻走出嚟，話民主黨做咗個民調顯示99%嘅上水居民唔滿意水貨活動阻塞街道，67%嘅人認為水貨問題比過往嚴重等等，仲話嚟緊星期日要發起「反水貨遊行」咁話；廣男就覺得奇怪喇，明知嚟緊星期日係內地人嚟香港辦年貨嘅高峰期，林卓廷仲喺呢個時候搞遊行，係真心反水貨客，定係想搞亂上水博見報，又「話」畀人聽佢做好多嘢呢？

水貨問題嚴重 林卓廷責無旁貸

民主黨呢個訪問得200幾人、又唔知佢係咪隨機抽樣嘅所謂「民調」，廣男先唔去質疑佢嘅可信程度，但林卓廷作為當區區議員（石湖墟），其實唔駛做咩民調，基本上都知道北區包括上水、粉嶺嘅居民唔滿意生活畀水貨客影響到啦，佢做呢個民調，到底係明知故問？定係因為近排成日畀人鬧所以喺度做Show呢？更可笑嘅係，佢個調查話有成三分之二嘅上水居民認為水貨問題較過往嚴重，咁林卓廷係咪想間接話畀人聽，佢呢個當區議員做唔到嘢，對水貨問題難辭其咎？原來參選果時話「做返好上水」，只係一個選舉口號，明白晒！

對於林卓廷愛好炒作政治，廣男相信睇慣佢做政治騷嘅人已經睇慣晒，廣男認為林卓廷最值得譴責嘅，係明知嚟緊幾日喺內地人嚟香港辦年貨嘅高峰期，佢選擇喺嚟緊星期日喺上水搞反上貨遊行，仲要途經人流極多嘅上水新康街同埋龍琛路等地方，係咪想製造矛盾、釀成衝突先？

借遊行 博出位

可以預計得到，如果民主黨真係喺當日喺上水人流極多嘅街道搞「反水貨遊行」，最大機會發生嘅，就係遊行人士同水貨客以至商舖起衝突，會唔會動手就唔知，但想和平就好難喇！而發生口角、衝突最大嘅得益者係邊個呢？咪就係專製造矛盾嘅林卓廷囉，到時佢可以同記者、市民講佢「有盡力」反水貨客，仲帶埋隊踩落新康街、龍琛路，可以話係北區反水貨客「急先鋒」。但點解林卓廷2015年已經做咗北區區議員、石湖墟當區議員，到咗2019年先嚟做呢個動作？廣男唯一可以話畀大家聽嘅就係，今年年尾就係區議會換屆選舉喇，係政客開始要「蒲頭做嘢」嘅時候！

原圖：RTHK