出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
【精選文章】楊岳橋炒作政治 麻煩都專業少少!
【精選文章】楊岳橋炒作政治 麻煩都專業少少!

呢個世界,真係「沒有最荒謬,只有最荒謬」,當大家見到啲政客喺度搞事,批評有冇搞錯嘅時候,「更荒謬」嘅係見到有盲反派政客想借新移民問題炒作、提動議,之後到立法會討論有關議題時,「主角」竟然因為睇緊電視、唔喺會議廳,搞到個動議「自動收工」,立法會主席梁君彥被迫直接宣布休會。講緊邊個?咪就係公民黨黨魁、自稱係立法會「關鍵一席」嘅楊岳橋囉!老實講,政客好、「演員」都好,都應該專業啲呀嘛,玩政治炒作反而變成自己畀人「炒作」,楊岳橋真係想笑死人咩?!


不專業的政客


楊岳橋身為大律師,師承資深大律師蔡維邦,本身又係公民黨黨魁,集萬千寵愛在一身,盲反派上上下下據聞對佢期望都幾高,有意見仲認為楊岳橋當年喺參加立法會新界東補選嘅時候,講嘢唔錯之餘,又無攻擊當時嘅本土派候選人梁天琦,甚有「大將之風」,將來話唔定可以喺盲反派陣營入面「擔大旗」、做共主;不過,亦有意見話佢做議員最叻就係玩Facebook同IG,實事就唔多見佢做,至於係真係假,囍雨唔評論,大家自己思考一下就OK喇。


講返楊岳橋缺席呢單嘢難得有機會提出動議,討論市民所關心嘅事,雖然係冇約束力,但理應都係做到「實事」嘅時候,機會咁難得(有議員稱一個議員一屆只能提一次動議),竟然喺動議要討論嘅時候玩缺席,自己唔喺會議廳,呢個到底係咩玩法?到底佢係真甩轆,定係懶到、Hea到一個點連議員職責都唔想履行呢?囍雨真係好想知!


睇電視 唔開會?


根據楊岳橋放上網果條公開道歉短片,佢就話自己當時喺Office睇緊政制及內地事務局局長聶德權講《國歌法》嘅新聞所以冇去開會、提唔到動議。囍雨真心覺得呢件事「相當有可疑」!一個日理萬機嘅立法會議員,小事可以唔記得,但自己提動議要開會都可以唔記得,反而記得要睇聶德權個記者會?唔係話《國歌法》唔重要,重點係《國歌法》都仲未正式開始審議,楊岳橋想畀意見、想了解條法例,未來機會多的是吖,正常都唔會急在一時喎,因乜為咗睇電視而放棄動議機會呢?點講,其實都係講唔通囉。


囍雨見到,有唔少網民對於聲稱要守住議會「關鍵一席」嘅楊岳橋非常不滿,囍雨就覺得,大家唔應該嬲佢,反而應該畀多啲機會同支持佢,盲反派支持者唔好忘記,係你哋送呢個咁嘅人入議會架,大家咪繼續投票畀公民黨囉,等公民黨眾人可以繼續甩轆、等多啲人睇到盲反派嘅新一代領袖有幾「勁」先啱呀嘛,楊岳橋「加油」啊!!


圖片來源:RTHK

30
搞笑咩
4
嬲爆
5
超無奈

評論