出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
【是非不分】批評別人絕不客觀 張星煒混淆視聽亂咁鬧!
【是非不分】批評別人絕不客觀 張星煒混淆視聽亂咁鬧!

港大校委會主席李國章上月獲特首林鄭月娥續任三年,包括港大教師及職員會在內嘅幾個組織發表聯合聲明,批評續任李國章係「嚴重失誤」,要求修改《香港大學規程》,恢復校監榮譽性質角色,並將校委會主席任命權交予校委會等等;其中,教職會主席張星煒仲狠批李國章「何德何能」,質疑對方擔任校委會主席三年以來「無甚建樹」。睇到呢度,相信唔少讀者都會有個疑問:「張星煒邊位呀?冇人識你喎!」,況且呢班人反對嘅到底係個制度,定係李國章本人呢?如果兩者皆是,咁理據又係乜呢?


張星煒「對人唔對事」


老老實實,如果張星煒等人反對嘅只係個制度,咁囍雨都唔會批評嘅,始終香港係自由社會,任何人都有自由表達意見,只要唔好用違法手段,囍雨一定支持。只不過,齋睇張星煒嘅言論,似乎係「對人唔對事」居多,無啦啦將個話題扯到去「李國章何德何能」,點睇都唔係單單講緊個制度啦!


囍雨成日都話,要批評人,一定要拎出證據,至少都要講清楚理由,否則就好容易跌落「人身攻擊的謬誤」。李國章一上任就畀校內反對勢力質疑,話佢會干預同打壓香港大學嘅「學術自由」同「院校自主」,但幾年過去,請問當日(包括到今日仲係)大力反對李國章做主席嘅人,李國章有冇打壓或者干預過港大嘅學術自由?有冇打壓過校內言論自由?有冇破壞過院校自主?


李國章恪守大學原則


其實都唔使你班人答,囍雨已經可以幫你哋答埋,唔答案係「冇」!港大校委會裡面,曾經加入公民黨嘅港大政治與公共行政學系教授陳祖為去年十一月先至卸任,而立場超級接近反對派嘅港大法律系首席講師張達明,就更加至今仍然在任,過去幾年裡面,如果李國章有咩「行差踏錯」,一早畀人爆晒出嚟啦,唔通仲等林鄭月娥宣布續任咩!剩係睇呢一點,大家都已經可以肯定,李國章做校委會主席期間,一直恪守學術同管治原則,絕冇犧牲過港大利益。


查實,張星煒風格同香港反對派政客一樣,都係「凡事反對派」,當佢問人「何德何能」嘅時候,試問佢自己又「何德何能」去批評人(尤其係李國章根本冇犯錯嘅時候)呢?李國章曾經做過教統局局長、香港中文大學校長、本身係世界級外科名醫、學術地位更加係去到「院士」同「講座教授」級,剩係睇佢份履歷就知道,由佢去帶領一間大學嘅校委會,用「恰如其分」都貶低咗佢。囍雨又再問一句,張星煒份履歷又幾咁「把炮」,可以批評李國章呀?囍雨真係洗耳恭聽呀!

圖片來源:RTHK

8
支持
6
嬲爆
3
唔係呀哇

評論