聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
沒有最霸道只有更霸道
沒有最霸道只有更霸道

《生果報》其中一名專欄作者馮睎乾,尋日寫咗篇題為〈如何讀懂屈穎妍?〉嘅文章,內容扮晒理性分析,話屈穎妍寫嘅文章「充滿歪理」,又話要寫到好似佢咁唔容易架,因為要「用最荒謬的筆法,講最荒謬的道理,務求把文章說服力降到最低」云云,又大膽到話認同屈穎妍嘅文章理念嘅人都「愚蠢」喎。哇,兜個圈踩低其他人抬高自己不特止,廣男而家先知原來對一件事嘅理解只可以得一種,但凡同馮睎乾或者《生果報》立場或者睇法唔同,就一定係「愚蠢」,呢種思想真係「沒有最霸道只有更霸道」,難怪愈來愈多人都認同,但凡幫《生果報》嘅人,都一定不安好心,以破壞香港為己任啦!(曲線)

 

牛頭唔搭馬嘴


引起馮睎乾注意嘅屈穎妍文章,題為《為什麼文明都是錯?》,內容係批評當日有份出席   鄭若驊記者會嘅記者,表現惡劣及無禮貌、不斷將問題大叫出嚟。屈穎妍認為,司長為咗確保記者會流暢,喺過程中叫記者「文明少少,舉手發問」,但結果就被個別傳媒拎司長嘅語言神態大造文章,更出咗一堆充滿人身攻擊嘅報道出嚟。老老實實,你可以唔認同屈穎妍文章嘅內容,甚至反指「大聲唔代表冇禮貌」,但就絕對唔可以好似馮睎乾咁「避重就輕」,對於個別記者醜陋同無禮嘅表現隻字不提,只係重複一己論點:「鄭若驊被評為『霸氣傲慢』,主要不因為她叫記者舉手,而是因為她無視公眾質疑,拒絕詳細交代不起訴梁振英的理由。此事明明涉及法治形象,屈女士卻避而不談……」

 

呢啲咪就係「牛頭唔搭馬嘴」囉!屈穎妍篇文都唔係要討論「UGL事件」又或者「法治」,開宗名義就喺講「文明」、講禮貌,由頭到尾都喺講記者們當日表現惡劣、無禮貌,但你就死咬話點解篇文「無講到法治形象」,情況就咁如你睇NBA籃球賽,走去問點解「C朗」、「美斯」冇份「踢」一樣咁荒謬,最好笑係馮睎乾仲好意思話人哋篇文喺「極限寫作」,扮到懶有條理咁分析人哋寫作手法,真係「唔識就嚇死,識就笑死」!

 

無理兼霸道


講到底,某一件事發生咗,到底邊樣先係件事嘅重點,根本就唔會有絕對答案。馮睎乾唔係好支持言論同思想自由嘅咩,真係支持言論同思想自由嘅人,試問又點會寫出「唔BUY你嗰套、唔採用你嘅觀點」就一定係「愚蠢」呢類說話呀?何況,大家唔知記唔記得,馮睎乾都冇乜公信力可言架喇,早一排之嘛,佢喺專欄寫「UGL事件」,以為自己好風趣幽默,可以串到全國政協副主席梁振英同特區政府,可怕冇幾耐就畀人踢爆,話佢篇文「斷章取義」同「資料錯誤」之處甚多,連「HARD FACTS」都搞錯得,仲學人做評論,咁樣一位專欄作家,仲好意思話人哋寫嘅野喺無說服力、宣揚歪理,廣男真心覺馮睎乾唔識個「醜」字點寫就真!

圖片來源:蘋果日報網站截圖

9
唔係呀哇
2
超無奈
7
嬲爆

評論