所謂「一鼓作氣，再而衰，三而竭」，以民主黨立法會議員林卓廷為首嘅盲反派蝦兵蟹將，將「UGL事件」炒作咗四年有多，已經到咗「三而竭」、「無貨賣」嘅階段。廣男近日睇林卓廷Facebook，佢聲稱律政司司長鄭若驊「解唔通啲嘢」、「搬龍門」，應該問責下台，又話人有僭建果時就應該辭職云云。廣男覺得林卓廷呢番話堅好笑，律政司司長解釋唔啱你聽就要落台？咁林卓廷陪林子健出嚟開記招疑誤導警方、自己喺立法會搞事被捕、自己舉報又即刻披露梁振英受廉署調查涉嫌違反防賄條例第30條，對內又搞到民主黨大地震59人退黨等等，林卓廷自己唔辭去立法會議員職務兼退黨？要講辭職，林卓廷本人最應該辭職！

對內對外 罪狀多多

老實講，鄭若驊解釋「UGL事件」盲反派唔滿意係一回事，但係咪需要「問責下台」係另一回事；如果盲反派唔滿意鄭若驊解釋，鄭若驊就要下台，廣男真係好好奇有邊個問責司、局長唔駛「下台」呢？盲反派幾乎個個都唔滿意都要鬧架啦！林卓廷如果覺得人哋有問題就要「下台」，咁佢自己呢？標榜和平、理性、非暴力嘅民主黨，出咗林卓廷呢個喺議會搞事搞到畀人拉嘅立法會議員，林卓廷又唔話自己應該落台？

唔係講笑架，林卓廷炒作「UGL事件」咁耐，又作為「UGL事件」的投訴人，但屢次向外披露梁振英正接受廉署調查，涉嫌違反防賄條例第30條有關唔可以披露受查人身份果部份，佢又唔落台？仲有喎，之前林子健出嚟開記者會話畀內地人員擄走、畀人喺大髀「釘書釘」，之後被揭發作故仔、誤導警方，好似係林卓廷陪佢開記者會，甚至同佢商量單嘢點處理架喎，一個從政者疑似協助他人作故仔老屈其他人，廣男又唔見林卓廷落台？等到林子健出事之後，林卓廷就死都唔肯提起件事，當日有份「屈」內地政府，今日又唔敢回應，咁又應唔應該辭職呀？

人格卑劣 毫無政治道德

至於民主黨嘅「家事」，本來廣男就唔想多提架喇，但民主黨之前有59人退黨，其中58人屬於新界東支部，新界東正正係林卓廷根據地，而唔少退黨保平安嘅人更將矛頭直指林卓廷，甚至話佢人格卑劣、毫無政治道德！搞到自己個黨大地震，唔見林卓廷退黨？

如果覺得人家有少少問題就要落台，咁林卓廷對外涉嫌違法、陪黨友誤導警方，對內又搞到啲自己友「民怨沸騰」，大家話林卓廷係咪應該辭任立法會議員，兼退出民主黨呢？其實喺林卓廷一邊稱自己係前廉署人員，一邊又爆廉署內幕疑似犯法果時，「就應該一早要辭職，現時更加要快啲走啦」（此句出自林卓廷Facebook，佢將呢句話送畀鄭若驊，廣男代表網民將呢句贈番畀佢）！

圖片來源：RTHK