佢為反對派遊行示威嘅專業搞手，民陣今年元旦又會發起遊行喇；今年佢哋一如既往，打算以政府總部東翼前地作為遊行終點，呢個安排本來都叫正常嘅，點知民陣竟然公開話喎，歡迎「港獨」分子中途加入遊行隊伍，以及喺終點（即係政總）發言咁話。老老實實，民陣想點先？如果你哋遊行個訴求並唔係要「港獨」，咁點解要容許「港獨」份子中途加入，甚至安排佢哋喺中途發言？民陣知唔知道協助「港獨」份子「播獨」，隨時會步香港民族黨後塵，被定性為非法社團架？
政府已正式拒絕讓民陣「播獨」
講返清楚先，雖然負責政府總部東翼前地申請嘅行政署已經回覆，表明「港獨」不符合「一國兩制」同《基本法》，特區政府絕對唔容許任何違反香港法律、包括《基本法》嘅活動喺政總東翼前地進行，不過以民陣嘅往績，佢哋又點可能會聽行政署勸告吖，件事到最後，好可能係「港獨」份子入到上址發言，大力宣揚分裂國家、危害國家安全嘅「港獨」思想，而民陣最後亦一定會搬出「言論自由」四個字去嘗試推卸責任！
其實，今次已經唔係民陣首次縱容「港獨」份子騎劫遊行架喇，就今年十月之嘛，當時已經有唔少「港獨」份子加入遊行行列，民陣當時就聲稱唔係自己主動邀請，但今次完全唔同喎，民陣會係安排「港獨」份子去到終點度發言，點睇都冇可能話唔關佢哋事，亦即係有理由相信，民陣已經由以往嘅「唔支持港獨」，變為今時今日嘅「聲援港獨、協助港獨」。囍雨好相信，想參加民陣遊行嘅市民，本身應該會反對「港獨」嘅，而家民陣本身已經變晒質，分分鐘會騎劫埋參加者嘅民意，話香港有好多人支持「港獨」、「自決」，咁反「港獨」嘅大家係唔係仲要盲目咁支持民陣呢？大家真係需要好好思考一下！
民陣隨時步民族黨後塵
仲有一點不得不提，民陣而家協助「港獨」份子宣揚「港獨」，仲特意為「港獨」份子搭建宣傳平台散播「分裂中國領土」嘅理念，喺《社團條例》之下，佢哋嘅所作所為甚至機會已經跌落「危害國家或公共安全、公共秩序」嘅條文，即係話保安局局長有權根據上述法例，將民陣定性為非法社團。為咗一時威風，搞到自己步民族黨後塵，係唔係真係值得呢？民陣領導人們，唔該你哋好好諗清楚啦，唔好到時又話人打壓「言論自由」、「結社自由」呀！
評論