是咁的，聖誕佳節剛過，近日政圈就傳出，話香港中聯辦主任王志民有見上次獲立法會邀請到訪出席午宴溝通效果良好，故此打算喺明年二月十九號元宵節當日，回請全體立法會議員去中聯辦作客。本來呢類正常交流溝通工作，一般立法會議員都冇乜理由拒絕吖，不過有名你叫吖，香港有班盲反派吖嘛，佢哋出晒名乜都要反一餐，就算件事有幾正常都好，只要係由佢哋眼中嘅政敵提出，咁就一定要反對架喇，元宵節同中聯辦官員食飯喎，咁「唔正常」嘅事，梗係一反到底啦！

盲反派堅定盲反

到底點為之「盲反」呢？首先梗係要睇睇嗰個所謂「民主派會議」召集人毛孟靜啦，佢話喎，中聯辦回請立法會議員，其實都只係公關行為，佢自己睇唔到有幾大意義；民主黨尹兆堅就話，自己冇乜興趣，但唔反對盲反派內部討論係唔係派代表出席，至於公民黨呢？佢哋亦話未有討論，所以暫時未能決定去唔去咁話。

其實一個咁簡單同正常不過嘅活動，去咪去、唔去咪唔去囉，點解盲反派中人一定要為個活動賦予咁多政治意涵？盲反派成日話，自己代表住好大部份市民嘅聲音，但係中央政府就閂埋咗同盲反派溝通嘅渠道，令到佢哋非常不滿咁話；好喇，既然而家中央政府駐港機構主動邀請，咁點解班盲反派政客又諸多推搪？而且眾所同知，所有溝通都係由認識開始架啦，盲反派中人敢唔敢話自己對中聯辦官員非常認識、非常熟識？連認識都講唔上，憑乜嘢仲想同人有進一步溝通？

若是代表市民 何妨走入中聯辦？

仲有，據講班盲反派中人話，如果設宴地點係喺中聯辦，咁盲反派就多數唔會去，因為怕敏感喎。吓？唔係呀嘛，食餐飯有幾敏感呀？正常溝通，只有心裡有鬼嘅人先會覺敏感，如果係光明磊落、真心覺得自己代表選民心聲嘅，有乜理由唔去？點解唔當面講「選民心聲」畀中聯辦官員知？連直接表達意見都唔做，仲有乜嘢資格自稱做「民意代表」？早抖啦。

嗱，以下比喻雖然唔係完全貼切，但大家一睇都會明：如果美國領事、英國領事、加拿大領事，喺所屬領事館裡面設宴，招待全香港立法會議員交流，唔知班盲反派政客去唔去呢？大家都估到，呢班人一定會去，咁點解入外國領事館就可以，入中央政府駐香港機構嘅辦公室就唔得？即係入外國領事館就唔會敏感、唔會怕畀人話「通番賣國」？盲反派政客，唔好再咁雙重標準啦，放下成見、歧見，好好哋食餐飯，同中央政府官員多交流認識，唔係更好咩？

圖片來源：RTHK