聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
【自打嘴巴】戴耀廷話要「乾淨選舉」?搞掂「雷動」筆帳先啦!
【自打嘴巴】戴耀廷話要「乾淨選舉」?搞掂「雷動」筆帳先啦!

前兩日無無聊聊上FB,偶然間發現一個名為〈乾淨選舉行動〉嘅專頁,內容疑似針對建制派之餘,仲見到「佔領九疑犯」之一嘅戴耀廷亦都LIKE咗呢個專頁,而且留言話「中共已非常純熟地操作它的選舉機器,污糟之極,一定要踢爆」。雖然個專頁暫時亦未見乜嘢特別內容,廣男當然唔可以不負責任咁去批評佢,但至於戴耀廷喇喎,廣男就真係好想同佢商榷,乜身為「雷動計劃」發起人嘅佢,真係有資格話人「唔乾淨」咩?


「雷動」為名「配票」為實


大家記唔記得兩年前立法會嘅所謂「雷動計劃」呀?簡單而言,就係藉住選舉當日向反對派支持者做民調,當日最後階段,「雷動計劃」會向被歸類為「雷霆救兵」嘅支持者發放私人訊息,等呢班「雷霆救兵」掌握最新選情,自行決定去唔去拯救嗰啲反對派邊緣名單。


嗱,一邊投票、一邊藉住調查去「配票」,呢種手法就真係「唔乾淨」喇!公然大規模「配票」,喺香港比例代表制下,隨時令到大量反對派名單「低票當選」,除咗對建制派不利之外,大家唔好唔記得喎,反對派內部其實都有競爭,咁樣公開指示「配票」下,乜對呢啲不被列入邊緣名單嘅又公平咩?唔好玩啦!


李卓人支持者被揭發「派湯派壺」


OK,如果大家覺得「雷動計劃」都唔夠污糟的話,唔緊要呀,廣男趣趣哋多兩個例子,等大家又評評理。喺剛過去嘅立法會九龍西補選,反對派代表李卓人嘅支持者,被踢爆一邊派李卓人選舉傳單、一邊派免費湯水湯壺券。呢單嘢,早排已經有人去咗ICAC舉報,廣男喺度就唔講太多,只係想問一句:唔知咁又算唔算「污糟之極」呢?


仲有仲有,2015年區議會選舉前,多個泛民政黨大舉向選舉事務處舉報選區內嘅「懷疑種票個案」,好似公民黨就因為喺美孚北選區「濫打種票」,令到大量守法選民感到滋擾而須公開致歉。至於當時身為民主黨副主席,但仲未做到立法會議員嘅尹兆堅就仲衰,喺佢當時所屬嘅石蔭選區「濫殺無辜」,令十幾個不涉種票嘅選民收到選舉事務處同法庭嘅信件,要求呢班良好市民提供住址證明,甚至「上法庭解釋」!最終,咪證明尹兆堅「錯晒」囉,唔知咁又算唔算「污糟之極」呢?


反對派「其身不正,何以正人」?


香港反對派特色係咩呢?「識話人唔識話自己」明顯係其中一樣,戴耀廷把口就話要「乾淨選舉」,實則留言內容就明顯有傾向性,只係針對建制派嘅懷疑個案,對反對派嘅喪德敗行就隻字不提。身為「違法佔領」發起人嘅佢,曾經口口聲聲話「俯首認罪,完善法治」,去到今日就公然走數,堅持打官司打到底;呢種人竟然走去話人香港選舉唔乾淨,對唔住囉,真係好冇說服力呀!

圖片來源:大公報

1
搞笑咩
2
唔係呀哇
1
超無奈
4
嬲爆

評論