認真啲啦《生果報》!
認真啲啦《生果報》!

為咗繼續炒作UGL事件嚟幫自己Keep住人氣,民主黨立法會議員林卓廷、尹兆堅等人眾籌咗超過200萬元搞「天下為公」,佢哋除咗不斷攞市民錢去奉獻畀律師同「旅行」之外,基本上每次開記者會、交待進展嘅時候都係無料到!林卓廷、尹兆堅噚日又走出嚟開記者會,今次仲話要去澳洲繼續舉報UGL事件;最好笑嘅係,佢哋有一啲擺明誤導人嘅資料向外公布,而向來「全力反中」、「反梁振英」嘅《生果報》又「照單全收」,囍雨真係想同《生果報》講聲,你哋做新聞好、「造」新聞也好,認真啲好嘛!


禮頓與梁振英有關?


其實噚日囍雨睇新聞,見到林卓廷、尹兆堅喺「天下為公」記者會果時,已經覺得好有問題,林卓廷、尹兆堅講到全國政協副主席梁振英同禮頓建築(亞洲)「下稱」禮頓有關咁,好容易令人聯想到禮頓同梁振英有咩「利益關係」。但實情係梁振英同UGL簽訂離職協議果時係2011年12月,兩年後即係2013年12月梁振英就同UGL再冇任何關係,而禮頓嘅母公司CIMIC喺2016年11月先收購UGL成為主要股東。換句話說,禮頓同UGL嘅從屬或者同屬CIMIC嘅關係,係喺梁振英已經同UGL再冇任何關係之後三年先開始,即係梁振英根本冇同禮頓有過咩關係,林、尹攞埋禮頓嚟講,擺明係老屈兼炒作囉!


如果係一般市民畀林、尹Fake到,咁都算啦,但《生果報》作為盲反派第一大報,居然又上埋當一份?《生果報》今日就喺一篇題為《「天下為公」赴澳洲狙擊梁振英》嘅報道引述尹兆堅寫住,「此事或與錢果豐被委任為港鐵主席及與UGL同屬CIMIC集團旗下的禮頓建築(亞洲)有關聯」、「禮頓建築(亞洲)則投得多項重要工程,包括興建港珠澳大橋香港口岸的旅檢大樓及沙中綫紅磡站月台擴建工程」等等;囍雨又想問下《生果報》,你哋做新聞聽完就算,唔駛查證?請問梁振英幾時同禮頓有過咩關係呢?如果有,你哋可唔可以講清楚啲呢?


低級調查員的低級錯誤?


除非《生果報》係冇心查證兼有心攻訐梁振英,否則囍雨覺得大家今次唔應該太怪責《生果報》嘅;事關林卓廷亦喺記者會上面大大聲講喺份UGL協議入面佢特別留意到「Group」呢個字,即係要推廣UGL集團,又話UGL之後畀CIMIC收購咗,質疑禮頓屬唔屬於呢個「Group」咁話!囍雨都係果句,由梁振英簽UGL簽協議開始,到協議到期CIMIC都未收購UGL,咁就算佢係「Group」都好,禮頓關梁振英咩事呢?林卓廷作為前廉署調查員,連啲咁低級嘅錯誤都犯上,信佢一成,真係 ……


講番《生果報》,囍雨覺得佢哋要「砌」人,相信「全港市民」都會理解,但如果連合約關係、時序以及梁振英從來與CIMIC、禮頓冇關係都搞唔清楚,就咁喺度引述啲政客說話、「炒埋一碟」又當係新聞用嚟攻訐人,咁就太唔認真喇!《生果報》作為盲反派嘅媒體代表,應該認真啲,大家話係唔係?


原圖:《蘋果日報》網站截圖

10
嬲爆
2
驚訝
1
超無奈
1
無意見

評論