精神分裂《生果報》
精神分裂《生果報》

高鐵噚日正式通車,正當好多人都期待高鐵通車方便到香港市民、更便捷地往番內地嘅時候,總有啲人希望高鐵出現問題,然後借機大肆貶低高鐵一番;好似《生果報》咁,大家呢幾日都喺佢哋嘅報道上睇到唔少關於高鐵唔好嘅新聞,好明顯佢哋就係開恆個Turbo盡砌高鐵啦。但奇怪嘅係,廣男又喺《生果報》嘅副刊見到佢哋有報道話高鐵通車,香港人可以喺西九搭高鐵去潮州打邊爐;呢啲一邊喺港聞版盡踩高鐵,另一邊就喺副刊介紹人搭高鐵番內地打邊爐嘅手法,算唔算係精神分裂呢?


把高鐵說得「一文不值」


睇呢兩日嘅《生果報》,有關高鐵嘅新聞可謂非常之多,不過十居其九都係負面嘅新聞,例如噚日9月23日嘅《生果報》港聞版,就例如有「口裏讚好 林鄭上京不會坐高鐵」、「僅賣出一成車票 陳帆稱銷情理想」等報道;到咗今日,即係高鐵正式通車嘅第二日,《生果報》直頭好有心咁出一系列報道「招呼」港鐵,包括「攞飛排長龍 行李限制玩殘乘客 高鐵首日通車 大混亂」等報道。由此可見,《生果報》砌高鐵,真係非常「用心」、「用力」!


基於《生果報》嘅政治立場,佢哋要反高鐵、反「一地兩檢」當然一啲都唔出奇,奇就奇在廣男睇到《生果報》嘅副刊《果籽》,原來噚日有篇教人「北上搵食」嘅報道,話「高鐵通車去潮州打邊爐」,介紹香港市民可以搭高鐵去內地食買玩,而去過去嚟講較隔涉嘅潮汕,而家唔駛四個鐘就去到。呀呀!《生果報》一邊喺港聞盡踩高鐵,一邊又喺副刊教人搭高鐵番內地食買玩,咁佢即係想叫人搭高鐵定唔搭唔高鐵呢?廣男實在係睇唔透!


政治化高鐵 迎合FANS口味做壞事


老實講,傳媒有既定立場,有時真係好難避免,但好似《生果報》咁,一邊喺港聞版迎合盲反派Fans係咁踩高鐵,但一邊又要喺副刊迎合鍾意食買玩嘅香港人,其實兩邊報道加埋嚟睇,都唔知話佢係矛盾定識撈好!其實,佢副刊介紹高鐵一啲都冇講錯,以前用其他方法搭車要六、七個鐘先去到嘅地方,而家搭高鐵三、四個鐘就搞掂;至於《生果報》喺港聞版描述高鐵嘅種種不是,廣男就覺得香港段高鐵正式通車都未夠兩日,如果要中肯地為高鐵「點評」,都係觀察多一排比較好。 


原圖:《蘋果日報》截圖

10
搞笑咩
8
唔係呀哇
5
驚訝
0
無意見

評論