所謂「無頭公案」，出處大概係由於古代時候技術落後，當有死者畀人斬咗個頭，咁好多時候就查唔到死因、無證無據，冇得追查落去。香港近日都有單「無頭公案」喎，不過就唔係死人，而係「半港獨」組織香港眾志聲稱自己有兩個成員喺內地被拘禁問話，但就冇人證、冇物證，得個「講」字；呢啲單方面指控，《生果報》一如既往如獲至寶咁，今日直頭起條題話港府「拒跟進」上述事件添。查實大家問心，呢啲咁嘅所謂案件，乜真係有得跟進咩？

在情有理都難以跟進

香港眾志呢次嘅指控最大問題係咩呢？第一，冇人證，唔只冇獨立第三方人證，係連當事人都冇！講真，要立案調查呢件事，甚至要特區政府向內地公安部門查詢，起碼都要有個當事人吖，尤其係呢類咁嚴重嘅指控，至少當事人都應該現身說法，而唔係由香港眾志班第三者去指指點點吖，如果特區政府咁樣都可以「跟進」，咁先至係荒天下之大謬，而且貽笑國際囉！

第二，冇物證。係呀，真係乜嘢物證都冇，得一幅由香港眾志自行設計嘅示意圖，記住係「自行設計」喎，咁講真你畫乜都得啦，唔係咁都想話係證據呀？你拎住呢幅「自行設計」嘅示意圖要求特區政府「跟進」，廣男又真係想問《生果報》可以點跟進呢？不如你哋整返篇文章教吓全香港市民吖。

「當事人」是否存在也成疑

第三，冇報警。呢個就算唔係「未能跟進」嘅唯一原因，亦肯定係「主要」原因。由香港眾志口中發生呢件事，到開記者會「公布」，足足遲咗差唔多五個月，嗰兩個謎一般嘅當事人一直冇報警架，而家成件事係「冇原告，但有被告」，大家覺得有冇問題先？對於特區政府嚟講，嗰兩個都唔知係唔係真實存在嘅「當事人」連警都唔去報，咁我又想問《生果報》一句，特區政府可以用咩方法、理由去「跟進」呢？

香港眾志口中聲稱嘅呢單嘢有幾無聊同垃圾，連日來已經唔少人分析過，廣男喺度就唔想批評佢哋喇。反而《生果報》雖然係有政治任務啫，但唔該都畀返少少專業出嚟，正所謂「臨時演員都係演員」吖嘛，唔好係又炒作、唔係又炒作，以為加插返出名偏頗嘅反政府組織「民陣」嘅一、兩個評論就可以令到個「報道」變得合理咩？算把啦！

原圖：《蘋果日報》截圖