【認清真相】小桃園飯局 誰才是受害者?
【認清真相】小桃園飯局 誰才是受害者?

近日,因為有人喺網上撰寫文章談及「小桃園飯局」,甚或意指全國政協副主席、前特首梁振英同江湖人士「有關係」,令「小桃園飯局」又再重新進入市民嘅視線;港大法律學者張達明甚至到梁振英Facebook留言,話梁振英競選團隊出席「小桃園飯局」而「與會中有人有江湖背景」係事實。囍雨就覺得,張達明所講嘅係事實,不過只係「部分事實」,「小桃園飯局」有江湖人士出席係無容置疑,但邊個叫啲江湖人士出席,同埋背後目的係咩,先至係真正嘅關鍵事實;如果單純見有江湖人士出席飯局就推論到梁振英或者佢嘅競選團隊同江湖中人有關係,就算唔係老屈,都一定係以偏概全!


小桃園飯局「有陰謀」!


講開「小桃園飯局」,請容許囍雨白啲講句呢單嘢「非常鬼」,而且仲要係有陰謀果隻!事緣喺2012年特首換屆選舉期間,梁振英競選辦幾名要員「受邀」去「小桃園」聽下啲鄉紳講新界問題,點知在席有兩位懷疑有黑社會背景嘅人士參與,事件曝光後全城哄動,有人甚至指事件係「黑金政治」、「賄選」、「靠黑社會向鄉事施壓」等等。好明顯,某啲人唔係想話梁振英團隊認識江湖人士,而係想話梁振英團隊搵江湖人士向手握選委票嘅鄉紳施壓,甚至指團隊違反選舉法例,所以梁振英團隊要員都要去廉署報案,希望廉署查明真相,還團隊一個清白。


梁振英團隊根本不認識「上海仔」


好喇,咁啲江湖人士或者懷疑黑社會人士係咩人叫嚟嘅呢,梁振英澄清佢同競選辦成員根本就唔認識當中嘅江湖人士例如「上海仔」(郭永鴻),遑論係同江湖人士一齊見鄉紳拉票啦;班鄉紳又話唔識「上海仔」,仲有人話見到佢好驚添;至於「上海仔」本人,亦講明自己唔認識梁振英,反而曾經同梁振英對手唐英年共度「東京之夜」(喺東京一間酒店認識),而佢本人現身係因為一名鄉紳選委邀請。


換句話講,「上海仔」唔識梁振英,又係受鄉紳邀請所以先去「小桃園飯局」,如果話梁振英或者梁振英團隊請「上海仔」去同班鄉紳拉票,已經非常唔合理啦。另一個問題,就係個別出席「小桃園飯局」嘅鄉紳話知道有江湖人物在場,令佢哋「感到一定壓力」,但有傳媒翻查報道,喺2011年鄉議局新大樓開幕典禮入面,「上海仔」喺現場同多名鄉議局高層合照,同聲稱「受壓」嘅鄉紳搭晒膊頭添,仲有份幫手招呼局外賓客,如果話「上海仔」喺2012年出席「小桃園飯局」在坐者話唔識佢甚至令到班鄉紳受驚,實在笑死人喇!


梁振英才是受害者


雖然外界包括囍雨本人對「小桃園飯局」嘅真相都唔係完全掌握到,但綜觀種種已公開嘅事實,梁振英以至佢嘅團隊都冇乜可能同江湖人士有勾當,甚至極有可能梁振英團隊只係畀人「裝彈弓」、設計陷害。盲反派嘅政客、學者甚至法律界人士咁鍾意攞「小桃園飯局」嚟講,但佢哋又夠唔夠膽講「小桃園飯局」嘅已知詳情呢?佢哋梗係唔會講啦,因為不問是非,但求攻訐、抹黑到政敵,始終都係佢哋嘅天性! 


原圖:Tksteven

4
嬲爆
6
唔係呀哇
1
無意見

評論