「獨」害擴散 一鷄未死 一鷄已鳴?
「獨」害擴散 一鷄未死 一鷄已鳴?

多次煽動「港獨」甚至話要武裝革命,擺明踩過界嘅「香港民族黨」被政府考慮取締;但一波未平一波又起,香港外國記者會(FCC)喺呢個敏感時刻又要請「民族黨」陳浩天演講,搞到滿城風雨。同一時間,另一「港獨」組織「學生獨立聯盟」(下稱「學獨聯」)已經蠢蠢欲動四處宣揚「港獨」,話佢唔係受到「FCC事件」鼓舞都冇人信!種種跡象都顯示,「學獨聯」陳家駒成為「陳浩天」第二機會甚高,加上FCC同盲反派政客包庇,成為「港獨派」新頭目亦唔出奇!

 

「光復天星」 純屬政治操作


「FCC事件」客觀效果係乜呢?就係令到班「港獨」份子以為自己得到外國支持,亦令到部份香港人以為「言論自由」係「無底線」嘅,呢啲咁危險嘅錯誤概念,同當日「違法佔領」發起人戴耀廷提出嘅「違法達義」根本就如出一轍。「港獨」嘅種子喺FCC同盲反派政客包庇下茁壯成長,將來如果真係發展成暴力同流血事件,FCC同盲反派都責無旁貸!


陳浩天同佢個民族黨面臨取締,但一雞死、一雞鳴,另一惡名昭彰嘅「港獨」組織「學獨聯」近日亦因為旺角行人專用區「殺街」,部份街頭表演者移師到尖沙咀天星碼頭,「學獨聯」藉住有市民唔太喜歡街頭表演嘅心理,日前高調號召要今個星期六搞一場「光復天星碼頭」行動。到底「學獨聯」到時會純粹示下威,「狙擊」表演者定係甚至會用暴力,暫時大家都唔知道,但廣男可以肯定,「學獨聯」根本就係借機出位,想做「港獨」派「老大哥」!


其實之前FCC要請陳浩天演講,「學獨聯」已經話要喺當日喺場外搞「抗爭活動」;近日另一「港獨」組織「學生動源」前成員劉康因為帶同仿製火器去示威被起訴,「學獨聯」又呼籲叫人到法院聲稱。好明顯,「學獨聯」尤甚係佢哋嘅召集人係要利用一切事件增加曝光率,令自己一躍成為「港獨」領袖!

 

「以死相搏」 但要避走外國?

 

廣男唔知「學獨聯」成員或者佢哋嘅召集人陳家駒到底係真心搞「港獨」,定還是純粹搏出位;但如果佢諗住要搞「衝擊」、暴動甚至武裝革命,廣男勸佢真係要諗清諗楚。佢果幾位「港獨」前輩,「本土民主前線」前發言人梁天琦因為「暴動罪」被判監六年(案件另一主腦黃台仰則棄保潛逃緊),「青年新政」梁頌恆因為宣誓玩嘢被DQ、衝擊會議廳又被判監,而陳浩天嘅「民族黨」就面臨被取締;如果「學獨聯」陳家駒要學佢哋,係咪準備好坐監先?

 

仲有一個問題,就係廣男覺得陳家駒嘅來歷相當有可疑,明明近30歲,仲係「學生」組織嘅召集人?外界又唔知佢從事咩工作甚至邊間學校畢業;一個終日無所事事喺度搞「港獨」嘅人,背後係咪有咩金主叫佢搞事,真係值得商榷。 


原圖:Facebook截圖及網上圖片

評論