出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
作者其他博評
禁止民族黨運作 收殺一儆百之效
禁止民族黨運作 收殺一儆百之效

千呼萬喚始出來,政府終於出招禁止「港獨」組織「香港民族黨」,囍雨實在太開心、太興奮喇!保安局局長李家超今日講明,考慮緊助理社團事務主任根據《社團條例》所作嘅建議,禁止香港民族黨運作。李家超呢個做法,無疑係對所有「港獨」組織發出一個清晰警告,就係無論你係「明獨」、「暗獨」,定係所謂「自決」都好,如果繼續公然提倡同鼓吹違反《基本法》,以及危害國家安全嘅政治主張,你都隨時「眾望所歸,冇得留低」,下場就好似民族黨咁,玩完!

民族黨證據確鑿難以抵賴

李家超今日重申,會按法例要求畀民族黨21日時間去進行書面申述;不過囍雨認為,由於民族黨已經多次清楚、高調、公開咁講明自己「支持港獨、提倡港獨、爭取港獨」,就算呢一刻態度突然180度轉變都好,相信亦冇可能逃得過「滅黨」嘅命運。雖然李家超今日因為擔心會影響申述,所以唔肯講民族黨個案嘅細節,但其實一直有留意時事同新聞嘅市民都知民族黨做過啲乜,盲反派亦唔需要為佢塗脂抹粉啦。

話時話,民族黨召集人陳浩天,今年3月嘅時候其實亦去過台灣,出席一個由「台獨」組織舉辦嘅「五獨」論壇,仲成立一個「自由印太聯盟」,聲稱要聯合其他地區「圍堵中國」;到咗7月1號,呢名「港獨份子」又再去台灣出席一個記者會,會上宣傳民族黨係主張「港獨」嘅政黨。民族黨呢班「港獨」份子,已經唔係「齋噏」咁簡單,好明顯係已經開始付諸實行,而且亦同台灣地區嘅政治組織有勾結,根據法例一早應該要取締!

盲反派為反而反批評政府

雖然民族黨嘅行為明顯已經唔再係「言論」咁簡單,而係切切實實「分裂國家」嘅行為,但一班盲反派依然為反而反,批評政府打壓言論自由、打壓政治組織等等,呢啲說法根本唔合理。公民黨黨魁楊岳橋仲話,呢一條條例係用嚟針對三合會,回歸以嚟未用過喺政治組織身上,但筆者睇返條條例,其實係有講到「維護國家安全」呢一點,以往未用過喺政治組織身上,係因為以前未有人搞「港獨」、冇人去做危害國家安全嘅事,而唔係因為唔用得喺政治組織身上,曾經話過「案底」令人生更精彩嘅楊岳橋,好心就唔好再曲解法例啦,你係大律師嚟架,有返少少專業操守得唔得呀?

「明獨」、「暗獨」一律不應存在

講開又講,除咗呢個所謂民族黨,香港其實仲有唔少在明在暗推動「港獨」嘅政治組織,如果引用《社團條例》禁止呢類組織運作嘅法理依據可以確立的話,絕對可以警惕到呢班政治組織,咁「港獨」主張就可以正式喺香港消失,實在係值得市民額手稱慶嘅美事!事實係,一旦「港獨」組織被政府根據《社團條例》禁止運作,若然班「港獨」份子拒絕遵從的話,就會成為「非法社團」,任何人繼續以成員身份行事,包括收取資助或捐款,都需要承擔刑責,甚至要判監。

「港獨」份子們,聽到未呀,希望你哋唔好再痴心妄想,繼續搞「港獨」只係同全世界為敵架咋! 

原圖:大公報

評論