聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
作者其他博評
大好青年惹官非 前程盡毀誰之過?
大好青年惹官非 前程盡毀誰之過?

無論閣下政治立場係乜都好,相信都唔會希望一個年僅十六歲嘅學生因為犯事而留在案底,甚至身陷囹圄。講緊嘅係「港獨」學生組織「學生動源」前成員劉康,佢涉嫌舊年喺立法會大樓外管有仿製火器而被告上法庭,隨時要留案底兼失去自由。盲反派不斷將年輕人參與暴力抗爭責任推畀中央同特區政府,但大家心知肚明,將年輕人推向暴力邊緣嘅,到底係邊一班人。


「違法達義」等如「推你去死」


到底係乜嘢令到年輕示威者(非針對上文提及個案)選擇一啲愈來愈激進嘅手法去表達政治訴求呢?其中一個理由,肯定同所謂「違法達義」呢個危險概念有關!眾所周知,港大法學學者戴耀廷所宣揚嘅所謂「違法達義」,其實即係叫人「為政治理由隨意犯法」,呢一種思想蔓延開嚟,釋放咗部份人、尤其年輕人心裡面嘅魔鬼出嚟,個個都以為,只要自己鍾意就可以犯法。


除咗有人講歪理,亦要有衰人附和同搖旗吶喊先至成事。就好似某個香港政客,本身仲要係讀法律嘅政黨領袖,當知道有盲反派年輕人因為參與暴力示威而入獄之後,竟然話:「今次入獄嘅13人(新界東北13犯),都因為案底而令人生變得更精彩!」呢個係邊個,咪公民黨黨魁楊岳橋囉!


政客叫人犯法 自己明哲保身


講得真係好,但點解楊岳橋自己又唔試試坐監嘅?坐監會令到人生更精彩喎,佢冇理由唔試吓吖?事實證明,楊岳橋講嘅全部係廢話,如果坐監真係令人生更精彩嘅,楊岳橋又點會唔帶頭去做違法或者暴力抗爭先!講到尾,因為佢係專業人士、有大律師牌,如果犯法可能令佢一無所有,即時「釘牌」,所以佢從來冇參加過暴力抗爭架,係唔係好叻仔、識走位呢!


講到底,盲反派政客最叻就係推人去死,自己同仔女就喺後面食花生。戴耀廷當日推廣「違法達義」理念時,講到明唔會畀自己子女參加「違法佔領」,但當時又冇人質佢架喎,可憐畀佢呃咗嗰班年輕人,一個又一個畀法院送入監獄,而戴耀廷仔女呢?傻啦,點會有案底呀?都冇犯過法!


睇到呢度,大家應該已經識講句公道話:年輕人愈行愈激,到底係邊個責任?

評論