睇波變宣「獨」 那是球迷還是示威者?

出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
 
2017-10-11

繼上次喺香港對老撾足球賽上面有球迷噓國歌後,噚日香港隊對馬來西亞隊嘅時候,再有球迷不理勸喻噓國歌、背向球場、展示「香港獨立」標語甚至做出不文手勢、大叫「支那」。香港隊會唔會因此被罰,例如罰款、閉門作賽甚至面臨更重懲罰仍然係未知之數,但囍雨就覺得有關球迷行為相當之唔要得;如果佢哋真心到場支持港隊,又點會做出「靠害」港隊嘅行為?到底佢哋係到場為香港打氣,定當咗自己係示威者入場做政治宣示?

球場變政治場

囍雨相信,絕大部分入場支持港隊嘅球迷,係一心一意支持香港足球隊嘅,不過,有少部分球迷似乎一心要入場玩嘢,成日喺播國歌嘅時候報以噓聲,如果佢哋係真心想支持香港隊,試問又點會明知香港隊可能受罰都仲要咁做呢?喺球場上播國歌,有人心裡面唔歡喜,其他人無從過問,但面對國歌、球賽以至香港隊,唔作出不當行為,係起碼嘅尊重,亦都係唔將球場「政治化」嘅應有表現!

尤有甚者,有球迷喺場上展示寫上「香港獨立」嘅標語,咁即係要將體育場地,變成宣揚「港獨」嘅舞台。香港足總都話,國際賽係唔容許展示政治或煽動性標語;如果班球迷有入場睇開波,囍雨絕對唔相信佢哋會完全唔知有呢啲規矩,佢哋「明知不可為而為之」,唯一嘅合理解釋就係佢哋要「玩嘢」,甚至係一心害苦香港隊!

國歌法更加要立法

一直以嚟,坊間對《國歌法》喺本地立法都有唔同疑問,例如公民黨法律界議員郭榮鏗就認為立法會帶來「更大衝突」;囍雨就覺得,撇除內地已經就《國歌法》立法嘅因素,既然而家苦心相勸都唔能夠令部分球迷改善,甚至有變本加厲嘅勢頭,特區政府唯一可行嘅應對方法,就係盡快為《國歌法》本地立法,適當懲處違法人士。

或者,《國歌法》本地立法之後都有人會以身試法,但囍雨幾可肯定如果唔立法,情況只會一日一日地變壞。有人唔滿意政府,唔代表佢哋可以唔尊重國歌;如果連自己國家所代表嘅國旗、國歌都咁唔尊重,囍雨衰啲講句,不如連自己將身份證都唔好要啦,上面大大隻學寫住「中華人民共和國香港特別行政區」架喎!

原圖:stheadline

其他推介

搜尋

博客