港大學生會幻想太多?

聶廣男,八十後,香港某大學畢業,主修資訊科技,I.T.新晉,靜待「上位」機會。對社會有不滿,未能置業,但比上不足,比下又有餘。傾向建設多於破壞,亦相信積極建言比將一切推倒來得實際。
 
2017-08-11

 

「港獨」思潮雖然喺近年湧現,但鑑於「港獨派」一言一行都令市民十分失望,甚至討厭,所以市民普遍都係越來越反對「港獨」。不過,唔知點解總係有個別人士要繼續鼓吹「港獨」,甚至自我陶醉,話「香港獨立」嘅口號曾經響徹金鐘;喺最新一期港大學生會刊物《學苑》,《學苑》班編輯就話要喺獨立嘅希望、幻想破滅嘅時候,用文字堅守獨立嘅信念。廣男真係好想問班港大學生,佢哋唔係到而家都唔知,點解「港獨」思潮「越講越冇」,甚至受人唾棄呀?

不是打壓 而是被市民唾棄

根據《學苑》或者「港獨派」嘅講法,佢哋梗係話推動「港獨」被打壓所以先搞成咁啦,但廣男請呢班人清醒啲面對事實,市民之所以唔支持、甚至唾棄「港獨」,係因為「港獨」嘅一言一行,都非常惹市民討厭。港大內部發生暴力衝擊校委會事件,學生會前會長馮敬恩等已經被定罪;上年年初又有旺角暴動,搞到幾十個警察受傷,仲要多名青年被捕甚至入獄,而主事者黃台仰、梁天琦去咗邊?有冇幫過班畀佢哋涉嫌煽動而被捕、被告嘅青年?答案係唔覺有囉,先搞事、後逃避嘅所謂「港獨派」政治領袖,仲想叫人支持「港獨」?

仲有,喺幾個月之後嘅立法會DQ案,同為「港獨派」代表人物梁頌恆、游蕙禎明明已經贏咗立法會選舉,仲要喺宣誓嘅時候玩嘢,又拒絕/忽略誓言兼且侮辱全球華人,搞到滿城風雨,佢哋而家去咗邊?答案係又唔見咗囉!市民本身偏向唔支持「港獨」係一回事,呢班「港獨」派搞到香港人對佢哋神憎鬼厭,港大《學苑》班編輯仲以為「港獨」係因為受打壓先搞成咁?好心佢哋就認清事實,認清市民討厭佢哋嘅真相,唔好幻想太多啦!

市民普遍反對「港獨」

其實社會上反對「港獨」嘅民意已經非常清晰,之前中文大學做嘅民意調查都顯示,大約只有11%市民支持「港獨」,雖然計番數11%人都唔係話好少,但好明顯大部分市民都反對「港獨」,其中15至24歲青年支持「港獨」嘅比率,更下跌24個百分點;即係話連成日畀班「港獨派」洗腦嘅青年人,對「港獨」支持度都大幅下滑。港大《學苑》班人或者會繼續幻想自己點樣推動「香港獨立」,但連差唔多年紀嘅青年都越嚟越唔Buy佢哋,好明顯係有理由啦!更何況香港大部分市民都明白,「港獨」只有死路而沒有出路可言。

另一個問題,係就算推動唔到「港獨」,基本上班「港獨」派都唔會承認自己係中國人,而只係「香港人」,廣男就覺得主觀上唔認自己係中國人,係冇人迫到佢哋嘅;不過,佢哋可以睇下自己張身份證或者特區護照,再諗下如果佢哋只係「香港人」,其實法律上係冇身份嘅。主觀上唔認係中國人,但法律、政治、歷史以至文化脈絡而言,其實都好難唔認自己係中國人;退一步講,如果咁堅決話自己唔係中國人,咁張身份證或者特區護照都唔好用,咁就型喇!

其他推介

搜尋

博客