讀漏豈同拒絕? 長洲覆核王浪費社會資源

出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
 
2017-05-17

到底香港有冇人濫用司法覆核呢項《基本法》認可同賦予市民去監督政府嘅權利呢?是咁的,濫唔濫用到,社會未有答案,但如果問「有冇人想濫用」,答案相信清晰好多。好似嗰個「長洲覆核王」郭卓堅咁,呢名司法覆核常客,早前入稟質疑特首梁振英就任宣誓時讀漏「香港」兩個字,認為宣誓無效,高等法院日前已頒下判辭,拒絕受理申請,誰不知郭卓堅死不悔改繼續上訴,仲勁不負責任咁話,就算再被罰訟費亦唔驚,因為已經預咗破產喎!

法官講明 梁振英並非拒絕宣誓

批評呢個所謂「覆核王」之前,大家不如先聽聽法官點講。負責審理呢單司法覆核申請嘅法官區慶祥話,就連郭卓堅自己亦同意,梁振英只係喺誓詞最後一次出現「香港特別行政區」時,漏讀「香港」,明顯只是疏忽,而唔係「拒絕」宣誓,因此話宣誓唔符合法例要求,法律理據一啲都唔強。

再次,司法覆核本身唔應該遲過事件發生3個月向法庭提出,眾所周知,梁振英係喺2012年宣誓,郭卓堅事隔多年先至入稟,一來嚴重延誤又冇合理解釋,二來梁振英任期亦快將完結,盲目興訟只會係學術討論,完全冇實際意義。

入稟理由勁無聊

大家睇到啦,知道呢個郭卓堅嘅行為係幾咁無理啦。可惜,呢種人永遠唔會反省自己嘅過失,佢最近正式向上訴庭提出上訴,但同又指覆核目的並非要梁振英失去特首資格,只係要對方重新宣誓喎。

大佬呀,郭卓堅你無唔無聊咗啲呀?到底有冇人同佢講,佢呢種行為唔單止浪費公帑、浪費法院同法官嘅寶貴時間,令到更多案件繼續分更重要嘅係,佢某程度上已經當咗法院係佢嘅私人遊樂場,既唔尊重香港法院,亦視香港法律同法治如無物。

以為破產大晒 無視法院罰款

仲有喎,為咗避免有人濫用司法覆核,如果有人立亂興訟嘅話,法庭係會罰嗰啲濫用者要負擔訟費,老實講,正常人都唔想自己破產吖,偏偏呢個郭卓堅就冇有怕,仲話「橫掂都破產,破埋佢啦!」,繼續堅持上訴,呢啲人咁賴皮都有,仲話自己係為公義、唔係為做政治SHOW喎,搵鬼信啦!

查實郭卓堅咁多年來,先後提出廿幾次司法覆核,多數都獲批法援打官司,即係用納稅人嘅錢,但咁耐只係曾經勝訴一次咁大把。囍雨唔係質疑任何人提出司法覆核權利,但大眾享有呢項權利之時,係咪都要同時考慮同研究一下,到底有咩機制可以防止呢項市民監督政府嘅權利呢?公帑嚟架,大佬!

圖片來源:星島日報

其他推介

搜尋

博客