投薯片只搞對抗 公民黨無視民生福祉?

出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
 
2017-03-15

投票選特首,只係需要考慮政治立場,唔需要考慮候選人本身有冇料到?唔係吹水架,公民黨梁家傑真係話,曾俊華係最可以對抗「西環治港」嘅人選,仲講到明自己傾向投畀曾俊華添。講穿咗,理由咪只係「政治原因」四個字囉!大佬,原來投票選特首係咁架?完全唔使理嗰個候選人合唔合適?但唔好忘記喎,薯片一直話要「團結」、要同中央建立互信喎,唔通梁家傑認為薯片表面撐中央,暗裡反國家?

一手推倒普選 投票只為政治?

是咁的,非建制派當日一手推倒普選,之後積極參加佢哋自己口嘅「小圈子」選舉。呢種舉動本來已經令人好反感,點知梁家傑真係好似失憶咁,唔做立法會議員後,厚住面皮撲去參加選委會選舉,成為自己口中一直嘅「特權份子」,認真諷刺。

好啦,本來選舉制度係咁,如果選委們負責任咁去投票,選一個管治能力最高嘅候選人,咁都未必唔可以選到好特首嘅。點知,梁家傑真係夠「坦白」,佢講到明,因為曾俊華最有機會可以同中央對抗,所以一定要選佢,而另一候選人胡國興因為已經完成任務,所以最終即使只得「0」票亦OK喎。

唔使比理念、比能力、比政綱?

查實,胡國興政綱同立場本來同民主派就最近嘅,民主派喺選委會裡面有三百幾票,照計點都應該拎到啲飛吖!不過可惜吖,梁家傑打晒開口牌,講到出口話胡國興會低票落敗,因為喺佢呢班人眼中,「能力」唔重要、「理念」亦唔重要、「政綱」都唔重要,「對抗」先至係唯一條件,呢份「非理性」,真係非一般人可以想像。

或者真係好老土,無論係大圈子選舉又好、小圈子選舉又好,囍雨始終堅持任何選舉都應該係「比理念、比能力、比政綱」嘅,尤其係咁高層次嘅特首選舉,只有如此,選舉先會健康,選出真正有承擔同能力去管治香港嘅特首。

公民黨可以向港人交代呢?

梁家傑作為公民黨主席,公民黨上下都肯定以佢馬首是瞻,佢咁大膽講出嚟,咁係咪成個黨會綑綁投票呢?以前,唔少市民會因為公民黨主要由專業人士,尤其係法律界組成,對呢個黨真係充滿期望,希望佢哋理性、務實咁去爭取自己心目中理想嘅選舉方法之餘,同時亦可以理性論政,真正做到改善民生。

今日,梁家傑親口篤爆呢個幻想,大家記住,佢哋「投畀」邊個唔係問題,亦同邊個係候選人無關,佢哋「點解」投畀某個候選人先係重點囉!

圖片來源:takungpao

其他推介

搜尋

博客