「全民投票」涉侵私隱 戴耀廷冇理由唔識

出生於七十年代未,成長於八十年代。緬懷所謂的Good Old Days,對香港部份人時常嗟天怨地感無奈,認為香港仍然是「只要努力,仍有出頭天」的福地,不擅書寫中文,寧寫口語。
 
2017-02-14

呢個世界有種人,衰幾多次都好,都依然覺得自己做嘅嘢係「啱」,而且係「正義」嘅,就算全世界都無視佢,一樣要繼續搞局同破壞。講緊梗係由「違法佔領」開始,就成日想做非建制派「共主」,一次又一次興風作浪嘅港大法律學者戴耀廷啦!佢最近搞咗個「2017特首選舉民間全民投票」計劃(下稱「特首民投」),殊不知開始無耐就畀人批評,個網上投票系統有保安漏洞,尋日更加連私隱專員公署都出聲話佢哋涉嫌違反《私隱條例》。都係嗰句,唔好以為拎住個「民主」招牌就大晒,以為可以任意妄為,連法律都唔使遵守先得架!

先有保安漏洞 再被揭侵犯私隱

所謂「特首民投」當日一推出,已經被批評系統有嚴重保安漏洞,有機會畀人拎到參加投票人士嘅個人訊息,後果可以相當嚴重。當時戴耀廷等人仍然死撐,話個通訊軟件唔易被入侵云云。誰知一波未平、一波又起,私隱專員公署尋日發聲明,直指「特首民投」有誤導參加者同濫用個人資料之嫌,違反《個人資料(私隱)條例》下「公平收集個人資料」原則。

話時話,囍雨身邊有參加呢個「特首民投」嘅朋友話,呢個網上投票連身份證號碼呢類咁重要嘅個人資料都會收集,戴耀廷佢哋收集嚟做咩呢?「特首民投」嘅發言人話喎,資訊科技專家已經講咗問題,對「特首民投」系統好有信心咁話。

嗱,呢啲咪語言偽術囉!投票系統係咪安全,同投票系統有冇過多收集市民個人資料,完全係兩回事喎!投票系統安全又如何?咁亦唔代表「特首民投」可以喺未講清楚收集資料目的同用途嘅情況下收集個人資料,呢個問題一定要先搞清楚。

戴耀廷身為法律學者 卻不知法守法

如果講收集個人資料嘅問題,囍雨就有一啲Follow-Up Questions想問下戴耀廷:你哋收集咁多個人資料,除咗作為識別投票人身份,仲有冇其他用途?如果「特首民投」呢個Project完結,又係咪會即刻Delete收集到嘅個人資料呢?如果唔Delete,你哋又有冇講清楚留低嚟有咩用途,有冇問投票者接唔接受呢?呢啲只係囍雨憑自己對《私隱條例》理解所諗到嘅問題,戴耀廷身為法律學者,唔通咁都冇考慮過?

其實,打從「違法佔領」開始,囍雨就覺得戴耀廷只係攞住法律學者個名頭去做佢想做嘅事,「違法佔領」畀佢講成「以法達義」(但又唔找數)、「雷動計劃」又畀人話佢涉嫌違反選舉法例,而家「特首民投」又涉浸犯私隱,到底為咗「造王」同「造非建制派大哥」,戴耀廷仲可以去到幾盡呢?

戴耀廷發起「特首民投」,欲借此「左右大局」影響特首選舉結果,但不論「特首民投」點樣操作,最終都只係一個虛擬投票系統。試諗諗,如果前年政改方案能夠通過,今日市民參與嘅,就唔係「虛擬投票」,而係真正「一人手執一票」,透過選票選出心目中認為適合管治香港嘅特首。

原圖:RTHK、Takungpao

其他推介

搜尋

博客